زعلــــتي ليش ... لحمد البريدي

حــــوور · #1 21-08-2010, 05:10 AM

السلام عليكم و رحمة الله و بركاته ....

قصيده راقت لي كثيرا
لـ حمد البريدي

يقولون المحبه ويش!! واقول المحبه طيش**
هيام" مايعرفه كثر منهو منه يعاني**

بدونه.. ماتحس انك بوسط العالمين تعيش
وبه تقدر تعيش العمر كله وانت متغاني**

تحس ان فيه حد يهتم..تحس انك تطير بريش**
كلام صدق من واقع مهوب فلان وفلاني**

فتـنتيني يابنت الناس وقليبي تعلق فيش**
وانا توي (صغير) خايف لايحب ويعاني**

دخيلش غطي عيون" هدايبها سرايا جيش**
تراي ان مت من عينش اثامش وانتي الجاني**

ابد حطيني في عينش وداريني وانا اداريش
واحطش بين مرباط الوريد وبين شرياني**

ما انا اتكلم ولا اعذرب واقدر لهجتش واغليش
لو ان حكاش لي كله..((اكو شسمه)) ((وانا كاني))**

لكن لاوصلت الدعوى على ايش وما ادري ايش**
انا اقول انتفاهم حتى يفهم كلنا الثاني**

تقولين انت تنطق (( اش )) واقول وزعلتي ليش
انا ( مري ) واذا سولفت هذي هرجة لساني**

كذا يعجبش يامرحب مهويعجبش وش لي فيش
ترى عيب" علي اني اجنب سلم جداني

الى بطيتي علي اسأل واقول اشتقت لش وابغيش**
واقول حكاي من جدي منا اتصنع ولا اداني**

اقلد حكي ماهو لي لاوالله ما اقلد ليش**
وانا افخر في خوالي كلهم وافخر بعماني**

اذا غيري يغير لهجته عفوا" انا يا اخيش**
اموت ولا اغير لهجتي دام الله احياني