ياصحابنا ياهل الورق والملايين....

[الفريض]

ياصحابنا ياهل الـورق والملاييـن
مافيـه واحـد طـارفٍ ماتبونـه؟

حنّـا بلشنـا فالمـره والوراعيـن
مع الزمان اللي تضَـرّس سنونـه

متسلفين ونقْضـي الدْيَـن بالدْيَـن
حتى نسى الرجّال كم هـي ديونـه

مـن اولٍ نبْغـي نحـرر فلسطيـن
واليوم نبْغي من حمـاس المعونـه

وان زادوا الراتب تثـور البراكيـن
كلٍ علـى العسْكـر يبلّـق عيونـه

وهي مغير اميه وخمسه وعشريـن
ماتشتـري للبيـت كرتـون تونـه

والحمْد لله حـزّة العُسـر والليـن
والشكـر للكـف الكريـم الحنونـه

لكن قليلـه فـي كعـام المعاديـن
اللي على حـد الوطـن يحْرسونـه

جيشٍ على الحد السعودي على الدْيِن
رد العـوادي عـنْـه لاياخـذونـه

وجيشٍ يجابه في جميـع المياديـن
من وين ماكان الخطـر ينطحونـه

وعسْكر حرس وقت الملاقا شديدين
ماعندهـم وقـت المواجَـه ليونـه

متكاتفيـنٍ دون شيـخ السلاطيـن
من جا على درب الحرس ياكلونـه

وعسْكر الامن كم راح منهم كثيرين
الارهـاب مايرْحـم ولا يرحمونـه

دون الوطن واهل الوطن مسْتعديـن
ودون المواطن دمهـم يرْخصونـه

لو يدْبل الراتـب لهـم مسْتحقيـن
جنـد الوطـن بارواحهـم يفْتدونـه

والله يخلّـي الراجحـي للمساكيـن
اللي مع الضرف القـوي يزْبنونـه

صحيح ضرب البنك مايخطي العيـن
لكـن يهـون ولا حيـاة المهونـه

وياهل البكـار الطيّبـات المزاييـن
سعـر البكـار الطيّبـه يمْدحونـه

مافيه حاشـي عندكـم يابعاريـن؟
ادْخُل علـى الله مالكـم تغْسلونـه

طيّب خذوا له من كبـار المواعيـن
حرام في طعْـسٍ حمَـر تفْرسونـه

وياراعي المطبخ نبي منْـك سكيـن
وقطعة لحم والعظـم لا تكْسرونـه

اتلى العَهَد بالملْحمَه عـام الالفيـن
ياليتنـي شفْتـه قبـل تذْبحـونـه

كان انشده عن حلْمه اللي من سنين
هو حققه والا البَخَـت حـال دونـه

وان كان هلّت دمْعته يشْكي البيـن
قفّلّـت شبْكِـه وابْتسمْـت لزبونـه

احسن يموت وينتهـي بـام حدْيَـن
ولا يمـوت وهُـم بعـد يرْبطونـه




منقوووووله