البنت لأبن العم .. مع انك للخفوق اقرب

[عابره]

دعَتْني وجيت للموعد وكنت مْن الفرح كالطير = وجيت من العصر طاير مع ان الموعد المغرب

وجتني بس مدري ليه شعرت الجيّة هذي غير= وهي تقرب من عيوني شعرت ان الممات اقرب

وقلت الله يهوّنها عسى في جيّتك لي خير = انا من شفتـك أقبلتـي وانـا خايـف ومستغـرب

على كثر الحكي مدري كأنّه خانها التعبير = وقالت لي جُمـل وأشيـاء لا تكتـب ولا تعـرب

هدت فجأة تطالعني وأنا في حاجة التفسير= لجل نحكي بهدوء اكثر سألت: الحلوة وش تشـرب

فصاحت بي انا احبك ولك في هالحشا تقدير= وتدري ان المثل فينا وفـي احساسنـا يُضـرب

وكنت انت الوفي وانت البري من تهمة التقصير = ولكن ذي عوايدهم من ايام وزمـن يثـرب

تكون البنت لابن العم ورغبات الكبار تصير= وتدري الاقربون اولى .. مع انك للخفوق أقرب

وتدري للقدر كلمة.. لعادات الأهل تأثير= لذا أرجوك تتركنـي وانـا مـن واقعـك باهـرب

شعرت بحكيها كنّه قصاص وامر بالتعزير = شعرت الدنيا ضاقت بي من المشرق ليا المغـرب

مشت خلّت وراها طفل ما يدرك وش التدبير= يحسب ان الغرام أشعار شاعر واغنية مطـرب

ضحكت وماقدرت اني ألاقي لضحكتي تبرير= من اللي بوقتنا مرّه ضحك من لدغـة العقـرب

رفضت أستوعب اللي صار ولا استسلمت للتغيير= ثمان سنين اجي نفس المكان بساعة المغرب

ورغم ان الثمان سنين جرح وكلّفتني كثير = أنا لليوم أجي وأدعي.. تجي يارب .. تجي يـارب

ولكم تحياااااااااااااااتي



عابـــــــــــــره