( رحلّة الذكرى ) !!

[نايل الظفيري]

البارحه ضاق من كبر السـؤال الجـواب=اللي مايشفي غليـل ولا يريّـح ضميـر
كانت همومي دوات وكان حزّنـي كتـاب=وكانت سنيني رياح وصوت وقتي صفير
سريت مع رحلة الذكرى ذهـاب وايـاب=مابين غفّوة ظلال وبين صحّـوة هجيـر
ياما عشان الخطا اعميت عين الصـواب=ويا كثر ما كنت اشوف وكان قلبي ضرير
انا اكثر انسان اذّنب فـي حياتـه وتـاب=وانا آخر انسان مايزّرع على الأرض خير
ماهو غرور وتباهي كثـر ماهـو عتـاب=ولا هو حلا بالتفاخر قدّ مـا هـو مريـر
آمنـت بـإن البنـادم آخـره فالتـراب=وكفرت بلّي يقـول ان الله ابنـه عزيـر
افتـح والايـام تقّفـل للمواعيـد بـاب=ولو ما الأمل حيّ ذكّره كان مات الفقيـر
ماكنت اظنّ الأماني مثل طـرّد السـراب=حتى عرفت التعب من قبل احثّ المسيـر
يلّي شبيه السما لو ناض برق السحـاب=بيني وبينك شهق صـدر وتأنّـى زفيـر
أتعبتنـي وانـت ماظـنّ تْحمّـل عـذاب=والمشّكلـه انـت الاول بالغـلا والاخيـر
أخذتني من عقـر ذاتـي بليّـا خطـاب=وتركتني بين هقواتي وسـوء المصيـر
خطاك ما تحسب لجرح المشاعر حسـاب=وخطاي اسهبّت في حبّك وقلّـت الكثيـر
يكفيك عن غيبة حضوري حضور الغياب=ما دمت حلم بْحياتي استحالـه يصيـر !!