جاني واحد وقال بسئلك كم سؤال

فهيدان المصراني · #1 05-01-2012, 08:34 AM

جاني واحد قال بسألك كم سؤال
وقبل يسأل قلت : أنا ماني خبير !

قال: جاوب بس , يا ولد الحلال
وكل كلمه حطَّها .. بشطرٍ صغير

قال نبدي : شنهو تعريف (المُحَال)..؟
قلت: خل هالكلمه ف الشطر الأخير!

(القهر) : إن شفت دمعات الرجال
و(الوطن) : ( إنسان ) .. متغيّر كثير

و(الطفل) : لعبه على شاطي الرمال
و(الأمل) : إحساس في عين الضرير

(الوفا) : [ قلبين ] .. يجمَعهُم حلال
و(الرجُل) : اللي على أهله يغير

و(الرجا) : لا قلت : للواطي تعال
و(الفشل) : مدري .. ولكنه مرير

و(الشعر) : في وقتنا .. بدر وطلال
زين وأوَّل : حيل يعجبني جرير ..!

و(الغلا) : إحساس إلى حَد الخيال
و(العِشق) : لا شفت مَعشُوقِك تطير

و(الجفا) : إعكس مفاهيم / الوصال
و(الوصِل) : يعني تأكَّد فيك خير

و(العقل) : تسْفه أقاويل الجهال
و(الجهل) : إن قلت عن نفسك كبير

و(الخطر) : لا صار ما عندك مجال
و(البلا) : إن صرت معدوم الضمير

و(العجب) : لا صرت تسأل منهو قال
و(التعب) : إن كنت تبحث عن مصير

(الغنى) : بالنفس ما هو راس مال
و(الفقر) : من كان .. بأعماله فقير

يكفي يكفي .. أسئله إنهي الجدال
ويالله علمني عن .. السّر الخطير

ما أبي تضرب لي في غيرك مثال
قول: عنك وإعتبر سِرِّك في بير

جات طعنه مِن جنوبك و الشمال
يعني وضعك بين من حولك خطير

صاحبي وإن ضاقت بعينك ليال
لك فرشت القلب مفروش الحرير

في [ بلاد الحلم ].. ممنوع العقال
والمصيبه الشعب ما إختار الأمير

وما ألومك .. كان شدِّيت الرحال
دام بيتك جرح / وفراشك حصير

هذا تعريفي إلى كلمة( محال)
شي ودك فيه ولا يمكن يصير ..!