(مختاره لناصر الفراعنه)

[فلاح ال مخلص]

نـــــــــوال وبــــــــــسّ
,,
,,
جتنـي علـى غفـوة عيونـي تـدقّ الطـبـول
.......... ياما لها خافقي جـدّد لحونـه وشـال

البيـض تحـت الـسـواد يطـيّـرنّ العـقـول
.......... والسود فوق البياض يضيّعنّ الرجـال

وان شرّعـت مـن طرَفهـا صافنـات الخيـول
.......... شفت الأوادم على السكّة تجرّ الطـوال

وان سلهمـت بأكحـلٍ للنـاس مثـل الكـحـول
.......... ملعون ابو من يشوفه ما سكر ثمّ قـال

وان عاكسـت بالحجـاج المومسـيّ الخـجـول
.......... يا شرهة الله على عمرٍ يشوفه وطـال!

وان قضّت الراس يا دين النبـي ويـش اقـول؟
.......... فيما تشوفه عيوني صـدق والا خيـال

وان هزّت الخصـر والارداف عـرضٍ وطـول
.......... ما ظنّ به عقبها غصنٍ من الموز مال

خصـرٍ تهيبـل وانـا مـن قبـل فيـه مْهبـول
.......... وزوّد هبالي هبال وصرت كلّي هبـال

قالـوا لـي المـوت قبلـه شـربـةٍ بمْعـسـول
.......... واشوف انا الموت لا هزّ الدقاق الجلال

يشرح علـى الخـدّ قصّـة عنبـرٍ حَـبّ لـول
.......... وبالشامة اللي على خدّه ضرب لي مثال

بيـن النهـد والنهـد مـا شـلّ سـاق الذلـول
.......... ومن دون هاك الجدايل يقصرنّ الحبال

يـذوب منـه معـزولٍ لا قضَـبـت مْـعـزول
.......... طالبك يا ذا النوال من الثلاثـة نـوال

وان فـاح زاكـي عرَقهـا فـاح شـيٍّ يـهـول
.......... تعال يالعود الأزرق شمّ ريحـه تعـال

جمالهـا سـرٍ أعـجـز معـجـزات الحـلـول
.......... كلْ ما لقينا له آجابـة تجـدّد سـؤال

لـو مثلهـا معجـزة مـن ربّنـا مـع رسـول
.......... ما مات حيٍّ وهو ما شاد لـه بالكمـال

هـذا جمـالٍ يبيّـض وجـه مـن لـه يطـول
.......... ايه ايه هذا الجَمَال اللي يهـد الجبـال

زيـنٍ فتـن قبلـي اللـي يلبـسـن الحـجـول
.......... وش عاد بيقول فيه منكّسيـن العقـال

زيـنٍ مسحنـي مـن الدنيـا ثلاثـيـن حــول
.......... يمكن خلقه الولي شمسٍ وانا له ظـلال