الشاعر / ماجد المهنا

[عقاب]

السلام عليكم ورحمة الله وبركاته


بعض القصائد المختارة , للشاعر / ماجد بن مهنّا
قراءة ممتعة
..
.

قلعة الآمال

هجوس شعري دوم فـ أسترسال = تمنع عيوني من لذيذ النوم
يطحن رحاها فكري الشغّال = لين المعاني تبلغ الحلقوم
مالي معَ بدع القصيد اشكال = من دينمو الافكار للبلعوم
دايم على ذا الوضع والموّال = للجزل في قضيّتي مرسوم
صوتي يبي له حنجره واحبال = من سلك فولاذ وذهب وكروم
اربْ ناصية الشعر تحتال = فرايدن من دري المنظوم
اصعب على النقّاد والحبّال = من ساعته في يومه المحتوم
كم واحدن حدّر عليّ ومال = وأقفى عليه من الزمان ثلوم
كفي شطير وصكتي سلال = واسمي قلق واطلالتي جاثوم
طبعي كذا ماجامل الجهّال = من دون عمري مالحقني لوم
فـ انا عدو الذلّ والانذال = وانا رفيق الكايد الشغموم
ذكري معَ الوافين طيّب فال = والله يجنبني عن المذموم
لو انّ جيبي مايضمّ ريال = ماجيت مستعطي ولا محروم
عليّ سرابيل الغنا سربال = ورثتها من (زايد الملطوم)
وإلى قصرني شيء بأية حال = ماكامل الا الواحد القيوم
للصبر في عيني شُعب واشكال = واجلّها صبري على المقسوم
ماكل شيءٍ فالضمير يقال = بعض الامور تشيّب المفطوم
خج الضلوع الطاري القتّال = خلا تحت عيني أثر ووسوم
ما وقّفتْ رجلي على الأطلال = حتى عصاني قلبي المكلوم
من كثر مادمعي يشبْ وسال = ماعاد عندي ثوب فيه اكموم
خلقت اجاهد راحل ونزّال = من وين ماوجهه لقيت هموم
أحسّ بالتهميش والأهمال = ماكن لي ديرة وربعي قوم
قد لي سبوعين وثلاث ليال = كل يوم وانا اقول هذا اليوم
بآسج وابني قلعة الآمال = واعيّن اطيور الضياع تحوم
لا حول صدق ومطولك يا بال = وَ حوم كبدي من سنيني حوم
واعدت لي عشرة وانا جمّال = مافيهم اللي زبن المضيوم
مافيه داع اشمّت العذال = واذيع سري واظهر المكتوم
لابد ياتي للفرج مدخال = واذوق من رحيقه المختوم
دخنا نحايل حظنا البطّال = نبكي على ماضيينا المردوم
إلى اغتنت مدينة العمّال = راحت على راع العزوم عزوم
غدا الرئيس بكفة الحمّال = من يلتفت في سورها المهدوم ؟
يا رب أجرنا ساعة الاهوال = جار الزمن وتْغيّر المفهوم
تتعاقب الأحداث والاجيال = كنّا بذاكرة الليال حلوم
الناس تفنا , والقبور تهال = والوقت يمضي , والسنين تشوم

..

مواجع

عيني من الضيق وكْبار الفواجع = كم وانا اغط المدامع وآآخفتها
قبل اسجْ الرجل والعالم هواجع = خوف لا تظهر على الناس ألهفتها
آآآه لو كفّت عن السجع السواجع = ما بقى بي غير عبرة واشعفتها
فتّحت كتب , وملفات , ومراجع = من حديث الذاكرة ما ألفتها
فـ الصدر هذا تباريح ومواجع = لو سرت في صدور خلق الله كفتها
كنت احسّب ان الصبر هيّن وناجع = لين قفّت عنّي وروحي قفتها
( شيخةٍ ) على المحبين اتشاجع = ماتقدر جاهة الوصل ان لفتها
تاخذ الالباب وتقض المضاجع = حمّلتْ نفسي كثيّر وكلفتها
لا متى بكذب على قلبي واراجع = والله ان تبطي بقلبي سالفتها

..

طيشك وتعجيلك

هبي بصحنك واصبحي وامسينا = لا كبرت الشرهات واحراجي لك
ياللي سبايب جفوتك عانينا = تدري وش اللي يفرقك عن جيلك
غير الزمان اللي فرق قلبينا = وغير انتكاسة حالي وتبجيلك
غيرك نعاف مواصله ويجينا = وانتَ تعاف وصالنا ونجي لك
حتى رسايل حبي وماضينا = ماتوا معي واحساسي الناجي لك
لو ما شحنك البعد وش بايدينا = هذي نتايج طيشك وتعجيلك
هاتي جميع احزانك تسلينا = وخذي بقايا ضحكة احجاجي لك
ولا عدوا الخفرات وان عدينا = يا جعلهم فدوة ثرك ورجيلك

..

هب الهوى

هب الهوى وتساقطت الاوراق = والى بغيت اروق كيف اروق ؟
للهاجس .. المتفرد الخلاق = مالا يعد من الطروق طروق
في كل غدراً يلعج البراق = له في ضميري ربله وزملوق
غنى عليّ في جملة العشّاق = مع الكرامة عاشق ومعشوق
الذل : ماله فالحشا معلاق = والعز : من معلوق لا معلوق
الراس ذا ما خلق للدنّاق = دايم بفضل الله عزيز وفوق
والله لاسايق ولا منساق = مدام له بين المتون عروق
صليب راي وراسي وتوّاق = للطايله والمركز المرموق
مع ضيق التفكير والآفاق = ماني بمتشره ولا مخنوق
بيني وبين الطيبين وفاق = واربي المغرور والمطفوق
آآسم عصاة الذاير المنعاق = واكسر عصاة الباير الممحوق
كل ابلج ن متجردن شعّاق = على النقا له فالظلام بروق
نجم ن هوى من شمّخْ الاحداق = يعوض عنه الكوكب المفلوق
إلى غلبّه الليل والارهاق = مسموح لا لاحق ولا ملحوق
الله غنيّ , وللرجال اخلاق = لو الليالي سابق ومسبوق
الرزق عند مقسّم الارزاق = ماهوب عند العبد والمخلوق

..

حادي القاف

ياحادي القاف بانت وانتهى دورك = ما عاد فاد الصبر والوقت يدركني
اجيك من لهفتي ويردني، جورك = ما ودي اقول ويش اللي تملكني
لا يزعلك شيء لا هد الجفا سورك = بعدك وقل اهتمامك فيّ شككني
ايام عمري معك لو ترضي غرورك = على كُثر ما تبكيني تضحكني
كم لي وانا من بعد شاطيك وبحورك = غريق لو ان ذراع الشك ماسكني
احسّ مالي نصيب بْصادق شعورك = من يوم شفتك وذا الاحساس مهلكني
ما ودي احرج مقامك واجرح حظورك = من شان هذا تركتك قبل تتركني

..

يا ماخذ الروح

يا ماخذ الروح لا تاخذ معك بوحي = اللي بقى لي من ايامك ومن بوحك
علمتني كيف اهدك واكبح جموحي = وتركتني قبل اردك واكبح جموحك
على الوفا والنقا باني لك صروحي = وعلى الجفا والشقا باني لي صروحك
عذروبي اسلوبي المكشوف ووضوحي = وعذروبك اسلوبك المكشوف ووضوحك
لا تزعل ان قلت لك بآآبعّد شبوحي = الوقت بيين غلاي ، وبّعد شبوحك
ما مرّك الحب غير جروحك جروحي = لو مرّك الحب كان جروحي جروحك
عادي لو اكذب علشان على روحي = لكني ابييك ما تكذب على روحك ..!!

..

دفتر قصيد

يا ملهم الفكر ويش اقول وادوّن = وانت اتراوى لنا في كل قافيّه
الهاجس ان غبت عنّه ساعه ايخوّن = وشلون لا صرت غايب عنه موليّه ؟
منين ابلقى على وصلك لي امعوّن = مدري وش آخر جفاك ووش تواليّه
في كل يوم اقول باسج واهوّن = أدلّه النفس عن طاريك .. ومعيّه
يا صدق من قال وجه الوقت متلوّن = لكن ما ينسي الرجال ماضيّه
يوم ان عرف الهوى محفوظ ومصوّن = والشك زايل , وضحك السن ماريّه
قبل المواجع تصدَّر منك وتموّن = محاجري دمعةٍ من عام مكميّه
عز الله ان قدركم قد شيّد وكوّن = في داخلي بيت لكن مات راعيّه
لا تنشد ايامنا من عقبك اشسوّن = ينبيك (دفتر قصيد) اتلااه مرثيّه

..

يا عذابي

يا عذابي كل ما حان الفراق وبيّن = ولا ذكرت ان كل وصلٍ يقتفيه مفارق
وين ابلقى مثل وقفاتك ووين اعيّن = من يرد العلم لا صار الزمان مزارق
أنت لو تدري بعد فر قاك ويش ازيّن = كان ما تشره على دمع الفراق الحارق
قاسيٍ ما ترحم عيوني وعودك ليّن = غاربٍ عن وجهتي دايم وحبك شارق
كثر ما سجيت لك رجلي ابيك عويّن = كثر ماجريت لك صوتي لا لاح البارق
والله ان قد لي وانا أكمي طعنتك متشيّن = وان سهم فرقاك في عوج الحنايا خارق
كل شيء الا غرابيل المحبه .. هيّن = وكل شيء في لقاء الاحباب .. شيء وفارق
ماتبي توضيح لكن للفرص متحيّن = ومن قبل لا يطرق أذنك من عذولي طارق
كنت اظن انك تومّن بالهوى وحنيّن = ولا دريت ان حضرتي مسروق وأنت السارق

..

بريت الحال

بريت الحال يا سمح المحيّا = عثر بي في دجا حبك جوادي
حفتْ رجلي على درب الجفيّا = ولا قدرت جهدي واجتهادي
بغيت القلب يدْله عنك , عيّا = وحسب تفكيري و حسب اعتقادي
( لقد اسمعت لو ناديت حيّا = ولكن لا حياة لمن تنادي )
ثمان شهور وصلك ما تهيّا = وانا مالي مثل صبر المهادي
لو اني بـ اتحمّل واتريّا = ما شمّت بي تجاهلك المعادي
تعال ولا تسوي بي كذيّا = وحقق منيتي واقصى مرادي
هذا بيتك / ومدهالك هنيّا = تنق بكل عرق وكل وادي
حزامك / قلب تاخذه الحميّا = وزهابك / عقل وعيون وايادي

..

خير

وش جاك مني يا رفيقي خير ! = وش مزعجك يوم اتقفاني !؟
تكذب علي وخانك التعبير = ويضيع علمك واتبلاني !!
ولو ان منت بضايع التفكير = ما كان جاني منك ماجاني
لكن نقول ان ذا الامور تصير = والله يحرسني وياقاني
بدمح خطاك وبتناسى مير = راجع ملفاتك على شاني
أنا موهبه تستاهل التقدير = حتى من خصومي وعدواني
لأن الحكي عني بلا تبرير = كثّر علاقاتي وصدقاني
حكاويٍ تبنى على التشهير = أكرم وتكرم عنها اذاني
انشد حساسيدي كبير صغير = عن وقفتي في زوغ الاذهاني
عدوا لي العدة وجيت مغير = وتساقطوا واحد ورى الثاني
بنات الفكر فرّع , وراسي زير = يا كثر ماستغفرت واغواني
يدوي به الهاجوس لي يسير = في حانة افكاري وقيفاني
مدامه , أجزل ما كتب لا غير = وعشيقته , فصاحة لساني
ركز معي سياسة التشفير = ماهي بساليبي ولا اداني
ماداني الألحاح والتكرير = ومافيه داع اعيد شرطاني
سهله ولا ظني تبي تفسير = ( أنا أنا .. قدري وميزاني )
من بورة الايام قدني طير = كفخت لا بارت بجنحاني

..

مرثية / في الشاعر .. فهد عبدالله محمد المهنا . الله يرحمه

يا عين دمعتس ماهو برخيص يوم انّه = حوّل على غترتي من حرّ ماجاني
ازريت لا كفكفه وازريت لا كنّه = ومن وين ما الد وجهي عنه يلقاني
صار الحزن فالحشا شلفا ومنسنّه = قدتْ معاليق خفّاقي وشرياني
على الذي نادر وفارق ولا منّه = خذاه مني طريق الموت وابكاني
كنت اغرف الشعر من بحره ومن فنّه = واليوم مالي طراة ولا لقيفاني
يا كبر فقده علي ويا كبر ظنّه = اضحيت كني عقب فرقاه متداني
موعود اشوفه بعد يومين لكنّه = شاف المنيّه ولاقاها وخلاني
ابكيه وابكي على فرقاه حيث انّه = ماهو ولد عمي الا ثامن اخواني
لو اني امْن التراب الطاهر احنّه = هيلو ترابه على صدري علشاني
لعل تبرى الجروح , وتبرد الونّه = ويطيب جوفي وتطفي منه نيراني
النفس من كثرت الصكات ممتنّه = ولاعاد يفرق معي ضحكي وحرماني
للعمر ذكرىً لها فصدورنا حنّه = وللوقت وجه ن شحوب ن كنّه اياني
آمنت باللي كتب لي والقدر لانّه = ما صابني لو كرهته ما تعداني
الموت تالٍ الحياة وللزمن سنّه = لو طال عمر الليالي حاضر وداني
استغفر اللي له الافضال والمنّه = وألوذ به من شرر نفسي وشيطاني
باموت قبل آتحلوى سجتي عنّه = وانا ادري اني ولد فاني , واخو فاني
اللي بقوله عسا مثواه للجنّه = والله يجبر عزا ربعي .. وشيباني

..


يا شيخ

يا شيخ وش خانة فلوسك وهندامك = ومذري ن في ذراك العالم الهايته
فنجالك ابرد من ابرد شيء فعظامك = بتموت وجهك قصير ، ومدتك بايته
الوقت ما ليّعك .. والفقر ما ضامك = وتْخاشر اللي بدون فراش بملايته !!
بداية الذل : رقم ن باول ارقامك = ونهاية العز : رقم ن هذي بْدايته
قد عرّض المجد من حولك وقدامك = وعفا عليه الزمان .. ولا بلغ غايته
والله لو اتحجج اهل البيت بحرامك = الحاضره حاضره .. والفايته فايته !!

..


صرخة بلا عنوان

بحتْ بلاعيّمك وفالك سيّ = يا صرخةً رااحت بلا عنوان
غير الدعا والصبر وش بإيّديّ = انا حبيس الياس والخذلان
خلقت متجري , وصلب , وعيّ = وادمت يدي سلاسل السلطان
قمع الإرادة بالرصاص الحيّ = إيولّد التغريب , والعدوان
مابيني وبين السياسة شيء = لكن لي : قلب وعقل ولسان
بآموت ماشافت عيوني زيّ : = فعايل ( الانسان فالانسان )!!

..
.


للشاعر / ماجد المهنّا

[الـعـابـر]

صح لسانك ولسان شاعرها

[●• Ŝђǿǿq •●]

إنتقآءآت رآئِعه ..
لـِ شآعر متمكًن ..
صح لسآنه وتِسلًم يمينكـً ..~

[ابورامي]

تسلم على النقل وصح لسان الشاعر لاهنت

[عذبة الصفات]

صَــ√ــحِ لسانك ولاهنت ع الابيات الروعه
تسلم يمناك