في محل بن زنيفر .. محسن الهمامي

ضيف الشعر .. · #1 22-04-2013, 09:31 PM

السلام عليكم ورحمة الله وبركاته..

يسعدني التواجد بينكم و يسرني ان انقل لكم هذه الابيات الترحيبية للشاعر محسن الهمامي يرحب فيها بالشيخ سعود بن فهد المستحي الدعجاني وابناءه في ضيافة الشيخ فهد بن مطلق بن زنيفر العجمي ...

في محلّ ابن زنيفر بدايتها السلام
ومرحبا وامون حسب العوايد والسلوم

الخوي عندي وعند المشاكيل الحشام
أخْو لو ماهو شقيقي ولاهوب أخْو توم

ايه أرحّب في محلّه وانا ضيف الكرام
ضيفهم وأعْزم وأرحّب ولو جيت امْعزوم

باسم ابن مطلق فهد مرحبا ترحيب عام
قالها واقولها بالخصوص وبالعموم

باسمه وباسم المطاليق من صبيان يام
مرحبا ما شعشع البرق في عرض الغيوم

قال رحّب في عتيبه رفيعين المقام
وبعدها خصّ الدعاجين قاسين العزوم

الدعاجين آهل الخيل مروين الحسام
جارهم يامن وعدوانهم تشكي الهموم

لابةً يهتزّ من وقعهم صلْب العظام
شلفهم من طاح منها يطيح ولا يقوم

من عتيبه يوم للخيل في نجد التطام
خضّبوا بالدم دهْم الهنادي والسهوم

زاحوا زحول القبايل وصاروا فالسنام
يا مدوّر للعلوم استمع جدّ العلوم

آخذوا وادي الرشا وارتعت فيه الجهام
وإن طلبتوني شهود الشهود مْن الخصوم

إن نشدتوا بن رشيد انشدوا معْه الإمام
ازْهمت عروا طلال ووصل للقوم قوم

تلطم العايل وذبّاحة الحايل .. كلام
الخلاوي .. يوم عدّ القبايل والسلوم

ضيف وأمدح ضيف ماهو بيلحقني ملام
وإن مدحت معزّبي ما لحقني فيه لوم

من شياطينً على الخيل لا ثار العسام
ومن سلاطين المجالس مداغيش القروم

ربعه العجمان يوم المداحم والزحام
بوشهم يرعى المخاطر وتحماه الوسوم

شامري لا جار حمْله تنهّض به وقام
يحتمي دور الخوي وإن زما العايل يزوم

لا نخيته ما تعذّر بقانون و نظام
المراجل دايمه والمصالح ما تدوم

أشهد إنّه راس مالي عليّه بالحرام
أصْوكً راسه و منعور و مخرّم خشوم

قلتها سفطان من باب قدرً واحترام
وخدمةً وكفايه لفهْد في بعض اللزوم

والسلام بداية القول وختامه سلام
وأعتذر وإن كان زلّيت ماني بمْعصوم

وسلامتكم ..