قـــولــــوا يـــــــــالله....

[عبدالرحمن المري]

بسم الله الرحمن الرحيم

السلام عليكم ورحمة الله تعالى وبركاته

وشلونكم يالربع؟؟ إن شاء الله بخير

أقول هذه القصيدة لي أنا كتبته لكم في هذا المنتدى الشامخ ((منتدى العجمان))

وعنوان القصيدة((الوسم قرب ويالله طالبينك الغيث يالله))

يالله بمـزنً يهـول وتذهـل بروقـه = رعادها ينسمـع مـن قبـل بارقهـا
مزنً حقوقً صـدوقً ثقلـه يعوقـه = في مشيها كن والي العرش عايقهـا
ينشى من الغرب ريحً صلفه تسوقـه = والريح من وآلـي الاقـدار سايقهـا
من شافها قـال ياساتـر لمخلوقـه = يالله تحفَـظ عبـادك وانـت خالقهـا
على اول الوسم كلً يطلـب اوّفوقـه = حساب علم الفلـك علمـه يوافقهـا
لا جاء مع الفجر تمطر صافي حقوقه = على أول السر تبـدأ فـي حقايقهـا
سيلً يسيّـل مسيـلً تكثـر طروقـه = من ضلع جمران الى الملقا طرايقهـا
والظهر من فوق صفرا السر مدفوقه = تصب خيره علـى القيعـان تغرقهـا
والعصر فوق النفود تسيّـل عروقـه = مشيه مع النّفـد كـن احـدً يعرّقهـا
وتالي نهـاره تهـل بطيـب غدوقـه = على ديـار الوشـم تكثـر غدايقهـا
يسيل منها شعيـبً مرمـسً عوقـه = ضيع مجاريه وكـل عقـوم يشلقهـا
يملئ الخباري وكـل دروب مشقوقـه = حتى الحزوم الرفيعـه قـام يصفقهـا
نهار خامس تشوف الارض منتوقـه = بـاذر نبـات الوسـم بيّـن مناتقهـا
وتربع ارض عقب ماهيب محروقـه = من حر شمسً طول الصيف تحرقهـا
يفـرح بنبتـه فِريـقً يتبعـه نوقـه = بدوً من الوقت عجزة عـن علايقهـا
واهل المكاشيت عاشق شاف معشوقه = يضمهـا ليـن يسمـع دق خافقهـا
يازين مجلاسنـا والصبـح بشروقـه = في وسط خبرىً ربيع الوسم وافقهـا
متخالطً حرفـه وروضـه وثعلوقـه = وان هب نسناس تكثر مـن تعانقهـا
ريح النفل والخزامى طيـب انشوقـه = يغشاك عطره مع النسمـه تنشّقهـا
وتلقى الزبيدي يباري نبـت رقروقـه = لا شفتهـا تذكـر الله ثـم تنّتقـهـا
والنار مـن بيننـا تَشعـم ومعلوقـه = بعروق رمثً وراعـي البـر يلحقهـا
في جنبها دلـةً صفـراء ومدقوقـه = دله من الكيف راع الكيـف ناسقهـا
فنجالهـا كـن در الحـور برموقـه = يسوى ثلاثين مـن غيـره ويفرقهـا
احب انا البر فـي ذكـره ومنطوقـه = كلمه تزيّن وجهـه وشفـاه ناطقهـا

وسلمتكم!!

[فيصل بن حجرف]

اول شي اسمح لي ان ارحب بك في منتداك اخي عبدالرحمن المري
ويسعدنا وجودك معنا بين اخوانك واخواتك
وصح لسانك على القصيده الجميله والله يجيب الخير ان شاءالله

[عبدالرحمن المري]

تسلم والله يافيصل بوجودك معنا

[عـزام]

الاخ عبدالرحمن المرى

يا مرحبا وحياك الله يالسنافى فى محلك بين ربعك واخوانك.

قصيدة أكثر من رائعه

وعسى الله يجيب الحيا وترجع ديار المسلمين.

صح السانك مدد لا عدد

ودام ابداعك

[عبدالرحمن المري]

هلا والله وغلا ياعزام بحضورك في هذا الموضوع وتسلم والله

وشكرااااا

[~¤¦أميرة^الحلواات¦¤~]

مساءك .. سعيد

كلمات رائعة وبوح يحمل أجمل المشاعر..

رقة وشفافية .. ازدهرت ورود الكلمات بين

سطورك .. وعبق المكان أريجها سلمت أناملك

على هذه اللوحة الرائعة ..

تقبلي خالص شكري وتقديري

دمت ودام قلمك النابض في مـنتدى صـدى المشاعــر


تحياتي وصفو ودادي


~¤¦أميرة^الحلواات¦¤~

[فيصل المشوط]

السلام عليكم ورحمة الله وبركاته

عبدالرحمن المرى

يا مرحبا وحياك الله يالقرم فى محلك بين ربعك واخوانك.

قصيدة أكثر من رائعه


في انتظار جديدك

[بحوور]

عبدالرحمن المري




صــــــح كــــــــلك مليـــــــــــوون

ولاهنـــــــــــت ،،




أختــــــــــكـ