مهرة ٍ توّني سمـّيت معسوفها

[الجويّر]

جادل ٍ ماخذلتني رغم قسوا الظروف = واعدتني ووفـّت بالوعد شوفها

يوم جتني وقالت شوف ياسعود شوف = ثم بصمت العشر في صادق احلوفها

قمت ارحـّب واهلّي في حسين الوصوف = لارحم اجد ابوها مازّين اوصوفها

يشدي الزين فيها من جمال الخشوف = لاكن انها جفول وباين ٍ خوفها

ان حكتلي تصعـّب باللسان الحروف = مهرة ٍ توّني سمـّيت معسوفها

جابها الله عليّه عقب حزن وحسوف = وشاينات الليالي زانت اصدوفها

قمت احاول اجرئها بلمس الكفوف = وثارت ام الثواير رجفة كفوفها

زينها من خيار الزين مقطف قطوف = ويل قلب ٍ عليها صار ملهوفها

عينها اللي تماري بارقات السيوف = من لحظها تمنـّا دايم ٍ شوفها

وطاغيات الهدب كنها جيوش ٍ صفوف = عسكر ٍ للحرايب غاب معروفها

وزاميات النهد بالصدر غض ٍ وقوف = جلّ رب ٍ ضمر بالزين سرجوفها

لو توسّع عبايتها بستر الردوف = ماسترتها عبايتها ونفنوفها

آه ياقلبي اللي بالحنايا يلوف = يوم ضميت جوفي في دفا جوفها

وقالت الحين بمشي قلت لحظه ينوف = ظامي العين توّه ماروا شوفها

بس غصب ٍ علي وانا عليها شغوف = غصب هديتها تقدير لظروفها

يوم راحت غدا للناي حزن وعزوف = لاكن الله يرجعها لمشغوفها



وسلامتكم



الشاعر / سعود رتيبان الجويّر