يا مل قلب

[الجـــــــــادل]

مل قلب يشـف الهـم ويخمـه = خمة عجوز ولدها بيـن روحينـي

قدام تزهق حياتـه قـال يـا يمه = ثم صفقة من عظيم الوجـد كفينـي

طاحت على صدره اللي واقف دمه = يوم اذهنت جرة الونـه بصوتينـي

وقامت تخمخم يديه وجـودة كمـه = تبيه وافخـت وزاد الهـم همينـي

وعلى النعش يوم قفو به بني عمـه = طاحت وقامت وهامت والهيم شيني

تدوي على ثوبه المنطول وتشمـه = وتسقي جثاث الشحوم بدمعة العيني

من حر فرقاه ما تمشي على يمـه = ولا تعرف الأحد من يوم الأثنينـي

وما ترقد الليل من حزنه ومن همه = والقلب كنـه يطعـن بالسكاكينـي

كن المعزي يشوف عيونهـا يمـه = تغيب وتذهلـلا جوهـا المعزينـي

جابو لها اللي قرا بالمصحف وتمه = يقرا عليها مـن القـرآن ياسينـي

وأنا مع الناس كني من وراء الحمه = الناس عندي ولا ادري من يحاكيني

أوحٍ بالعلم لكن مدري كيف باضمه = الله على مي هاجوسـي مودينـي

آرد على الهم ضامي وأطلب الجمه = عليك ياللـي تروينـي وتضمينـي

وتشوف حالي عقب ما غبت منسمه = ودواي بيديك لكـن مـا تداوينـي

أما وفاء والوفا تبـرى بـه الذمـه = ولا جفا والجفـا مـوت يبارينـي