غنت طيور الجـو ومعهـا تغنيـت

[الخيال الحر]

بسم الله الرحمن الرحيم
السلام عليكم ورحمة الله وبركاته .
من ديوان الشاعر تركي بن علي الفيصل اخترت لكم هذه القصيدة .
وارجوا أن تحوز على رضاكم .



غنت طيور الجـو ومعهـا تغنيـت
قامـت تبادلنـي لحـونٍ حسينـة
وكتبت معها الشعر وأبديت وأطريت
هـمٍ شغلنـي يـوم طـول كنينـه
حمست من بن الهراري وصبيـت
فنجال كيفٍ يقعـد الـراس زينـه
فتحت باب الشعر وأعلنت وابديـت
بيوت كانت في ضميـري سجينـه
وجبت القلم ياصاحبـي واستعديـت
وابدعتلـي أبـيـات درٍ ثميـنـة
أمس العصر في راس مرقاب عديت
قصدي أريح خاطري مـن ونينـة
لو بالتمني يابـو فيصـل تمنيـت
أعيش وسط البر وأنسـى المدينـة
مير الأسف مافادني قـول ياليـت
حيث إن روحي في المدينة رهينـة
كثر المشاغل والشقاء وخدمة البيت
تجبرني أجلس في حيـاتٍ مشينـه
حبيت شوف البـر حبيـت حبيـت
لانه يزيـل همـوم فينـي سكينـه
يعجبني شوف الروض لامن تمشيت
شوف الطبيعة طب روحي الحزينـة
كتبت بيت الشعر بيتٍ علـى بيـت
من خاطري نضمت قـافٍ رزينـة

[سمـــوم]

صح لسان تركي الفيصل وسلمت يمينك يا صح لسانك

[الاحرش]

صح لسان الشااعر تركي الفيصل

ولاهنت على النقل

[قطنان]

صح لسانك يا صح لسانك
وصح لسان الشاعر تركي الفيصل
ولاهنت على نقل القصيده
تـقبل تـحياتـي اخي الكريم

[ابو ياسر 5]

صح السانك مشكور ياالغالي وصح السانك ولسان الشاعرتركي الفيصل

ولاكن عندي طلب ياالغالي ابي اسم الشاعر تركي الفيصل كاملاً لو تكرمت