( خـيـالـة الـسـمـره ) سـالـم بـن جـخـيـر

[طلال بن قطام]

يالله ياللي جميع الخلـق تحـت امـره=انـك تجـازي هـل النمّـات والغيبـه

وانـك تفـرج لعبـدٍ ضايـقٍ صـدره=الهيّنه فـي عيونـه صـارت مصيبـه

عزيز واللي سواتـي مانقـص قـدره=والله مالِحقـنـي شــكٍ ولا ريـبـه

شاعر مجرب واخذت من الزمن عبره=وياشيب راسي من اللي شفـت ياشيبـه

ماكل منهـو يغيـب اجيـه ولاّ اشـره=بيموت ماقلـت لـه يامطـوّل الغيبـه

اميّز الضحكه الضحكـه مـن الكشـره=وخصمي واعرفه بضحكاتـه والاعيبـه

من بعدهـا ببتـدي وافصّـل النشـره=وكـلاّ يفسـر علـى كيفـه واساليبـه

يابنت انـا لابتـي خيالـة( السمـره)=ارداهم اللي مايِحصون العـرب طيبـه

فينا الولـد للمراجـل واهـبٍ عمـره=يحري بكلمـة نعـم والنعـم يحريبـه

فينا الولد يرتكي للحمـل مـن صغـره=من شاف فعلـه لـزومٍ انـه يهذريبـه

رفيقنـا مايجيـه ابـر مـن تـمـره=وعدونـا يابـري حالـه وطرجيـبـه

اشب ضوّي وسمره في طرف سمـره=والضيف يبشر بعشـر آلاف ترحيبـه

لانيب اجامل ولا دانـي هـل الزمـره=ولاّ رفيقـي تلـبـى لــه مطاليـبـه

اعز نفسـي عـن الهفـوات والعثـره=اخـاف كلمـة عذاريبـه عذاريـبـه

الدرب ماقـول ياطولـه ويـا قصـره=لو كـان فـي درب ماتِحمـد عواقيبـه

لا(ششت) كني هبيلٍ في طرف سكـره=لا جيب للموت طـاري قلـت حلّيبـه

وانتي لش المشط والريحـان والحمـره=وانا لـي العـز وافخربـه واماريبـه

وانتي لش الولولـه والدمـع والحسـره=وانا لـي المجـد والنومـاس والهيبـه

انـا ليـا قلـت عنـدي للفعـل قـدره=والا انتي اقصى علومش (ياقطع صيبه)

هاذي ترى زبدة الموضـوع فالنشـره=وكـلاّ يفسّـر علـى كيفـه واساليبـه

من راح يالله عساها لـي ولـه سفـره=ومن صدّق اهل النمايم ويش اسويبه!!؟؟

لكن قبل ماختـم ابياتـي علـى فِكـره=الله يجـازي هـل النمّـات والغيـبـه
وســـلامــتــكــم ســالــم بـن جـخـيـر