(((السيل ما يرحم غريق تحداه)))

[نبض المعاني]

هذه قصيدة الشاعر مهذل بن مهدي آل مهذل الصقور اليامي قالها عندما توفي أحد أصدقائه وهو المرحوم ( عبدالله فريك الصقور ) وذلك إثر غرقه في السيل ونظم هذه القصيدة عندما كان طالبا في الثانوية العامة .... وذلك عام 1413 هـ

البارحة ليـل السهـر والمعانـاه=سهران مالي رغبة ٍ في الرقـادي
لولا ضلوعي خافقي في الخلا تاه=تلعب به أنواد الشمـال الغـوادي
ياونتـي ونّـة ذيـابٍ مضـرّاه=في راس نيّافٍ طويـل المبـادي
عليك يالّي كـل ماقلـت بأنسـاه=وآسج منّه زارني فـي رقـادي
آشوف عبـدالله يجينـي بذكـراه=في الحلم كنّه لي بصوته ينـادي
ياحيْ ضحكاته وياحـيْ ممشـاه=وياحيْ مزحه والزعل والعنـادي
أهتز قلبـي يـوم قالـوا فقدنـاه=وأقبل عليه السيل في فـرع وادي
تسوقـه القـدرة لسيـل ٍ تغشّـاه=لين أختفى من عقب ماكان بـادي
عليْه سيل العجمه أنشـت دفايـاه=أنهدْ سيله مـن فـروع ٍ بعـادي
وبله سرى ليته تأخّـر بمسـراه=وسرى علينـا همّنـا والنكـادي
وقفْت فوق السيـل وآقـول يالله=لاتقطع حبال الرجـاء بالبعـادي
يومين مفقود ٍ وحن مـا وجدنـاه=عفنا شراب الما معـا كـل زادي
ندوّر أثـره مـن لقينـا سألنـاه=شفتوا لنا رجل ٍ معا السيل غادي
نرجيه بحبال الرجـا ونتحـرّاه=وشوفه معافا قصدنـا والمـرادي
والسيل مايرحم غريـق ٍ تحـدّاه=ماله رحيم ٍ كـون ربْ العبـادي
ومن عقبها ياوجد عينـي لقينـاه=قد مات لايسمع ولا هـو ينـادي
ميّت وروحه صاعده عند مـولاه=عسى لها الجنّات يـوم المعـادي
نبكي عليه بوسط الأكفان شلنـاه=يالله عسى يوم الحزن مايعـادي
يوم أنزلوهـ بجال قبر ٍ حفرنـاه=بكوا عليه الناس حضر وبـوادي
تكفـون عبـدالله بقبـره دفنّـاه=فارق اربوعه كلّهـم والبـلادي
وقفت فوق القبر دمعي بمجـراه=محزون وأخفي رجفتي وارتعادي
والموت ليته خذ بدالـه وخـلاّه=ليته يجنّب كل رجـل ٍ جـوادي
وليت الردي في داخل القبر يفداه=لاشك طرّاد المنا مـا أستفـادي
وجدي على فرقا كحيلان وجـداه=وجد البري الّي بالسلاسل يقـادي
وجد الكسير الّي تعثّـر بممشـاه=خلّوه ربعه في نهـار الطـرادي
أبكوا ونا ببكي رفيـق ٍ عرفنـاه=وياشين عقب المعرفه الإفتقـادي
نضحك له أمس ويومنا ذا بكيناه=اليوم قد هو في القبور انفـرادي
كم ليلـة ٍ زينـه تحدّثـت ويّـاه=مابيننا هجر وجفـا وابتعـادي
ياعين هلّي دمعتك عقـب فرقـاه=إبكي فراق الّي نـوى بالشـدادي
قولوا لعبدالله تـرى مـا نسينـاه=مادام نور الشمس للنـاس بـادي
والله ماننسـا زمـان ٍ قضينـاه=حلفت ماننسى الرجـال الجيـادي
قم يارسولـي ودْ خـطٍ كتبنـاه=صوب الرجال الّي تعرف القــــوادي
سلّم عليهم عدْ غيـم ٍ نثـر مـاه=واعداد سيل ٍ في مجاريـه زادي
ثم قل لهم حكم المقـدّر مـن الله=والصبر مفتاح الفرج والرشـادي
يا أهْل العقول يروح مثله وشرواه=الموت خذ قبله سبـاع ٍ عـوادي
راح النبي محمّـدٍ بأمـر مـولاه=وبني هلال وقبلهم قـوم عـادي
من مات عقبه ماتفيـد المواسـاه=ولايرجّعْـه العـزا والـحـدادي
وختامها صلّوا صـلاة ٍ مثنّـاه=علـى نبـي ٍ للمخاليـق هـادي

وسلامتكم

تقبلو تحياتي

نبـــــــض المعـــــاني