(الله يــقـطـع صيب مـن صيبـٌـك )

[سعود بن مهدي]

السلام عليكم
حبيت اتواصل معكم ولو بالقديم

هذي قصيده قديمه وسيتها على نسختين لارضاء جميع الاذواق

يـقـول :

يالجادل اللي لبستي ( البرقع ) بلبس ( شيك ) = سمي فديتك .. ترى الخسران من خيبـٌك

لبيه يابرقعك .. لاضمته وجنتيك = بـيـاض خدك وراه .. مبيـًٌت حبيبـٌـك

وعيونك اللي ( حورٌها ) هبـٌل الناس فيك = لاتحسبين ( الحورٌ ) في عينك معيبـٌـك

خلي العطر لآهله .. دام العطر محتويك = طيبتي العطر ولا العطر ماطيبـٌـك

ان قلت : مابيك !! .. انا نصاب .. واكذب عليك = طايح على خشتي .. واحاول أهيبـٌـك

عاد افهمي ؟ . لبى كبدك . والله اني ابيك = بس ابثير اهتمامك .. واصبح قريبـٌـك

يالعنبوك انا (أحبك موت ) و ( آموت فيك ) = حسي بي (الله يــقـطـع صيب مـن صيبـٌـك )

ادري ان راسك عنيد .. وماتبينه يجيك = مطفوقه وبايعتها .. وراسك مسيبـٌـك

((انتي لي لحالي)) وانا لك .. وبين ايديك = بتشيبيني غرام الين بشيبـٌـك


من كثر ما اشتاقلك ؟ ودي أماشي أخيك = مافارقه لو زهق مني ولو ريبـٌـك

والخاطر اللي يطيب ان شاف غمازتيك = ان طيبـٌك طـأب ,,, وان ماطـاب ماطيبـٌك

حبيبتي الله يخليك لأمك وأبيك = لا والله الا عسى يخليك .. لحبيبـٌـك

___

النسخه الثانيه

___

يالجادل اللي لبستي ( البرقع ) بلبس ( طيش ) = سمي فديتش .. ترى الخسران من خيبـٌش

لبيه يابرقعش .. لاضمته وجنتيش = بـيـاض خدش وراه .. مبيـًٌت حبيبـٌـش

وعيونش اللي ( حورٌها ) هبـٌل الناس فيش = لاتحسبين ( الحورٌ ) في عينش معيبـٌـش

خلي العطر لآهله .. دام العطر محتويش = طيبتي العطر ولا العطر ماطيبـٌـش

ان قلت : مابيش !! .. انا نصاب .. واكذب عليش = طايح على خشتي .. واحاول أهيبـٌـش

عاد افهمي ؟ . لبى كبدش . والله اني ابيش = بس ابثير اهتمامش .. واصبح قريبـٌـش

يالعنزيش انا (أحبش موت ) و ( آموت فيش ) = حسي بي (الله يــقـطـع صيب مـن صيبـٌـش )

ادري ان راسش عنيد .. وماتبينه يجيش = مطفوقه وبايعتها .. وراسش مسيبـٌـش

جعلش بعد كل من جاني وانا مستطيش = وياليت للجسم تيب وفيه بتيبـٌـش

((انتي لي لحالي)) وانا لش .. وبين ايديش = بتشيبيني غرام الين بشيبـٌـش

لاغبتي عني ! امــانــه ؟ قولي : شلون آعيش ؟ = ماشفتي حالي ! يومن آقول : وش غيبـٌـش

من كثر ما اشتاقلش ؟ ودي أماشي أخيش = مافارقه لو زهق مني ولو ريبـٌـش

والخاطر اللي يطيب ان شاف غمازتيش = ان طيبـٌش طـأب ,,, وان ماطـاب ماطيبـٌش

حبيبتي الله يخليش لأمش وأبيش = لا والله الا عسى يخليش .. لحبيبـٌـش