..................وقفه وانقلابه...................

[محمد بن حويله]

.................................................. ...................

راكب اللي بين كبوته وبابه=فتحة التبريد لبلوف المكينه
الركاده والمرونه والرحابه=بين شيصانه وفوق مساعدينه
لون بديه حزة المغرب يشابه=دَر بِكر تو اهلها حالبينه
زبدةٍ من عامل الأجوا مذابه=ذاب طارفها وقاعتها متينه
لو ورد في عهد الاشراف الصحابه=طافوا بمكه وصلو في المدينه
كنه شيخ مرتوي عز ومهابه=حافظن عهده وموروثه ودينه
صانعه ماخذ على الدنيا حسابه=ويوم نبعث ياجعل ماني قرينه
لامسكت الخط والدرب انتحابه=خطك امزفلت او ان الخط طينه
لاعطيته نار يعطيك استجابه=ولاطلبك اشياء عينك للكبينه
قوهم يالعنبا اللي هم كلابه=اشهد انهم اتقنوه مصممينه
لاخذا بالسوق وقفه وانقلابه=كم عيون فيه نظرتها رهينه
ماركبه اللي على الدنيا شبابه=مافرق بين التجوري والخزينه
مركب اللي من سموه لا جنابه=لاطلب له حاجة جاته بحينه
والا انا ياوجد حالي ااااخ يابه=كبر عين الحظ واقصارن يدينه
اتصبر كن كبدي مالها به=كني املك طايره والا سفينه
ماهو اكبر هم بس الذيب نابه=لاوقع ياقع على ظهر السمينه
لجل عين اللي خفوقي ماغدابه=كود ضحكاته ونظرته الرزينه
صلب شيخ ذيب واعياله ذيابه=زينه الجينات جينه فوق جيه
لون خده فيه من لون السحابه=وخشمه حدود الرهيفات السنينه
عيشته كنها طلابه في طلابه=فمه ماتقدر تعدي معه تينه
طلبة بامر الله انها مستجابه=اجمل احلامي يميني في يمينه
ليلة بين القراءه والكتابه=وليلة ما شَي من بيني وبينه
ماغبطت الخلق يوم الله جابه=يوم حسادي عليَه حاسدينه
بعدها ياللي سمعت اينه وابه=بالأصح اللي سمع ابه واينه
ابن ادم لو خذا الدنيا نهابه=رزقه وحظه موسم في جبينه
ومن جفى كل الصحايب والقرابه=يايدين النفس او نفسه تدينه
وان درابه صاحبه او مادرابه=يجني الانسان ماتعمل يدينه
صاحبي اقدره واقبل عتابه=ولو بدا تقصير منه عاذرينه
سجلو ياهل التحري والرقابه=وانقدو فيض الفكر ياناقدينه
بعدها ياراكب اللي في كتابه=والله ان تبطي ولاتسمع حنيه
ان حصل مثله لو يجيني اسطابه=والله ان قد اوصل لشبكه وعينه