جديده (( .. شوائب الساحه الشعبيه .. ))..!!

[حسن علي الهاجري]

السلام عليكم

صباح الخير يا وجيه الخير

قصيده متواضعه بعد استقرائي البسيط المتواضع عن الساحه الشعبيه ..

اتمنى ان ترتقي لذائقتكم الكريمه ..

:::::::::::::::::::::

يـوم البشـر مـا بـيـن بـايـع وشــاري=سوق الشّقا ما عاد لي فيـه سومـات
شـريـت راحـاتـي وبـعــت الـعــزاري=بعت الهوى والحب فـي خافقـي مـات
يكـفـي هواجـيـس الهـمـوم الكـبـاري=إليـا غـدت مـا بـيـن روحــه وجـيّـات
يكفـي ألــم وجــراح وهــل العـبـاري=ومسامـر القـمـرا وتسطـيـر الابـيـات
اليـا متـى ضعـف الـعـزم وانكـسـاري=واليـا متـى نركـب علـى كـل موجـات
نطـرد سـراب الحـب ســر وجـهـاري=ودروبـنــا فـيـهـا كـثـيـر الـمـتـاهـات
ومـن منـحـدر لا منـحـدر لأنـحـداري=العـمـر يمـضـي والليـالـي سـريـعـات
رحـلـة شـقـا مـغـبـاش ولاّ مـســاري=وانا انتظر فرصـة امـل بـس ماجـات
عـن ساحـة الشعّـار بخـلـف مــداري=الـوضـع مـتـدهـور بـكــل اتـجـاهـات
ساحـه بهـا سخـف وملاهـا الغـبـاري=وشعّـارهـا فيـهـم هــوس للـخـيـالات
يعنـي اســم شـعّـار اســم وشـعـاري=لا حـبـك لا مضـمـون كـلـه خـرافـات
لا فــكـــر لا إلــقـــاء والــكـــل داري=اشيـاء عجيـبـه وافطـنـوا للعجيـبـات
البـعـض منـهـم بالمـنـصـه حـــراري=وإلـيـا نـظـم شـعـره كثـيـر الحـركـات
فـوق وتحـت قـدم ويميـن ويـسـاري=زايـد حماسـه لأجـل عيـن الجمـيـلات
ولولا السّقف من زود لأهوال طـاري=يالله دخيـلـك كــن بالـعـقـل زوغـــات
مــا للشـعـر قيـمـه ولا أيّ اعتـبـاري=اليـا بقـى هالحـال مــن دون وقـفـات
تطبـيـل زايــف مــن مـحـرر قـمـاري=وتهـويـل اعـلامــي بـكــل الـقـنـوات
مـا عـاد بـه صـادق ولا بـه مــواري=للصّدق بيـن النـاس مـا فيـه شيمـات
دام الـحـرار الـيـوم صــاروا حـبـاري=وامس ٍ لهـم بالجـو صولـه وجـولات
وصاروا بنات الوقـت مثـل الجـواري=لأبليس وحزب ابليس في كل الاوقات
الـدّيـن مــا لــه عـنـدهـم أيّ طـــاري=كـذب ونفـاق وفــوق هــذا حــزازات
سـب وشتايـم بيـن ســاره وضــاري=تَجْعَـل لـهـا مانشـيـت كــل المـجـلات
وكـلّ ٍ بشيـنـه قــام يفـخـر ويـمـاري=تـقـول كـنّـه كـاسـب ٍ لـــه بـطــولات
وكـلّ ٍيقـول أنّـي ايتيكيـت وحضـاري=ومــا بــه تقالـيـد ٍ ولا فـيـه عـــادات
كل شيءما قد صار ذالوقـت صـاري=دنيـا ً تشـوف أبْهـا الامـور الغريبـات
مـا ناقـص الاّ يكـون سجـل ٍ تـجـاري=وزود ٍ على البلـوى تزيـد المصيبـات
واستثنـي الـلّـي للشـعـر مستـشـاري=الـلـي عــلا بـيـن النـجـوم الـمـطـلات
ومنهـو يغـط الحـق عـيـب ٍ وعــاري=يجلـس مـعَ رجـال الوفـا والـمـروات
خـلاص عقـب الصبـر مـل انتـظـاري=وقـررت لأجـل اريـح القـلـب بـالـذات
قـــرار ومـخـتـوم ٍ بختم ٍ وزاري=ولا يقبـل التّعديـل ومــا فـيـه مـيـلات
بـبـهّــر دلالـــــي وبــشـــبّ نـــــاري=مــا دام رجـلـي للمـعـالـي سـريـعـات
ومــا دام متـنـي للصعيـبـات ضــاري=وضاري على شيل الحمول الثقيـلات
ومادام أحس اليـوم عصـر ازدهـاري=وعرفـت اميّـز بـيـن حــق ودعـايـات
ومــن منطـلـق هــذا بغـيّـر مـسـاري=وبشطـب علـى كـل الـذي بالسجـلات
الغـيـت رحـلاتــي وبـغـلـق مـطــاري=لـو كـان يسبّـب لـي كثيـر الخسـارات
صحـيـح مــا حـنّـا بعـصـر البـخـاري=ومـن حولنـا كـثـرت عليـنـا المـلـذات
لكـن ابطلـب ليـن اشــوف انتـصـاري=ربّ ٍ تـعـلاّ فــوق سـبــع الـسـمـوات
واغلـب هـوى نفسـي بكـل اقـتـداري=بـعـزم واراده فــي زمــان التـشـتّـات
وللحـق ببـنـي فــي خـفـوق جــداري=من قبل نكتـب فـي سجـلاّت الأمـوات
وختامهـا يـرجـى قـبـول اعـتـذاري .=اليـا بــدر مـنّـي خـطـا بـيـن الابـيـات

::::::::::::::::::::

اخوكم // حسن بن علي الهاجري