ملامح الفرقا

[تمّام المجماج]

السلام عليكم ورحمة الله وبركاته

مصافحتي الثانية آمل أن تحوز على رضاكم وترتقي لمستوى هذا الصرح الشامخ بأعضائه ومادته


(( ملامح الفرقا ))

ياصاحبي بالجو عج ومعاصير=نذير سوٍ للعشيق ومصيره
ملامحك تنبي بمنفا وتهجير=للمغرم اللي ما رضا بالكسيره
لا تقول لي تعبان والبعد لي خير=من قال لك في بعد الاحباب خيره
صور لك العَذّال بالبعد تصوير=شويرك اللي بالردا فاح كيره
كانك قنعت براي راع المخاسير=اللي شقا للبعد واشقا بعيره
فانا حفيد اهل الظفر والمناعير=لابارك الله بالغرام وعبيره
للمقبل إقبالي حيامٍ على بير=وللمنكف إنكاف القطا مستذيره
وفي صاحبي ماطيع عذّال ومشير=لو كانت جيوش العواذل مغيره
أثني له اليمنى وبالثانيه سير=وصدري مدرع للسيوف الشطيره
لعيون من شاف الرفاقه معي غير=اللي يناظرني بعين البصيره
والحب له بالقلب سطوه وتاثير=وريح الندى بالسيف يعدم جفيره
لكن ما اخضع له ولو كان تعزير=عزيز في طبعي وكبدي مريره
واكما جروحي وانتهض كني الطير=اللي يصخر كل برقا شريره
وحتا همومي لو تجيني طوابير=اصبر ولي بالصبر اجرٍ وخيره
وياصاحبي هالحين.. خل المعاذير=قرر..لو إن العظم عاف الجبيره
بانت بك الخله وانا مستشك مير=عيني بصيره والسواعد قصيره
لا عالمٍ غيبك ولا ادري وش يصير=بالرفقه اللي بينت لي نذيره
و(( الصبح موعدكم )) وتصبح على خير=(( والهرج يكفي صامله عن كثيره ))

وسلامتكم

تمّام المجماج