وقولو له ذبحني لعنبو حيه=مايرحم الشوق غالي ينتظر غالي

[برنسيسة القلوب]

السلااام عليكم ورحمة الله وبركااته




هذي وحده من ابادااعاات المبدع دايييما : محمد جارالله السهلي

بيني وبين الشقى سلام رديه=يفتل جروحي وانا انقضها بموالي
عيد بي الهم واثر الدمع عيديه=ولاني ذاخره دام عيوني عيالي
ياعين هلي دموعك كل عصريه=وإن لمتك في يوم قولي مالك ومالي
محتاج طاروق له معنى وقافيه=واستبشري خير والشعر يتهيى لي
القدح من فكري يفر راس جنيه=وإن حضرت بي كتبت العالي العالي
ماشلتها عرضه ولا هي هجينيه=غنيتها مدري الطاروق غنالي
بس الوكاد انها قصه غراميه=ابطالها ههمي وغمي وغربالي
وإن قالو الناس هذا طبع الهواويه=قلت استوى عندي الترياق والحالي
العشق بلوى ونفسي فيه مبليه=خلوني اكتب وافضفض لاتفضى لي
المساله اكبر من احلام ورديه=الحزن لا من لفى جيته على فالي
حزني واعرفه واعرف ابسط مواريه=ولاني لحالي كثير اللي عرف حالي
ياوجد حالي وجود اللي هقاويه=خانته باغلى رفيق ولا لقى والي
وياوجد حالي وجود اللي بناخيه=عن عسر حاله وضيقه داله وسالي
في غيبة اللي تمادى بالانانيه=وخلاني بوجه حزني واقف لحالي
ياموسع الضيق لامن مر طاريه=كن الوسيعه تضيق لامر في بالي
وين انت ياللي بعادك ماثر فيه=غايب واحسك معي واشوفك قبالي
طيفك اليا مر حاجه لا اراديه=اتبع سرابه واجيه اسابق ظلالي
ياللي من حروفك تغار الرومنسيه=والله قبل لا افقدك فاقدك جوالي
في بحتك شي يشبه حزن مرثيه=ومن غاب صوتك وانا اللي صدق يرثى لي
وعيونك السود اعجاز وخياليه=نادر شبهها مثل ماتندر خصالي
ونظرتك تهدم كياني بكل عفويه=سلهم وشف كيف يبداء في زلزالي
وعودك اليا مال يالمترف بحنيه=قمت اتعزوى واطوح لاجله عقالي
وقلبي على ضمتك يسابق يديه=ويردني طيب ابوي ومرجلة خالي
تكفون ياللي تمرونه على نيه=قولو له الموت لامن غاب يبرى لي
قوقو له ان غيبته ماهيب عاديه=وخلوه يرجع يشوف بعينه احوالي
وقولو له إن صد والصده نهائيه=اشوى لي اصد لا والله وش اشوى لي
حيل الله اقوى عساها روحه بجيه=وعساه مايبطي ويرجع يسعالي
قولو له الله حسيبه كان له نيه=ماعاد يرجع لي وقولو له التالي
حرام كلي ضمى وايديه وسميه=وحرام مالي امل مادامها مالي