مية عام

[ليتني عجميه]

،؛، عقبال مية عام ،؛،
بن فطيس

عقبال ياماخذ فـؤادي ميـة عـام .. ضيعتني منك وأنـا مـا أهتديتـك

لا ..ما نسيتك كيف بنساك مـا دام .. ذكرى الفراق تهزني لـو نسيتـك

حبك قدر وأنا على ديـن الاسـلام .. مكتوب في وجه الجبين ورضيتـك

لك في الضمير الود والحشمه أتوام .. ولي في ضميرك مثل ما أنا بغيتـك

ولك منزلٍ في نايف القلـب وخيـام . وذود الغـلا ترعـاه ولا شكيـتـك

يفطر عليك القلب وان فارقك صـام .. والله لونك شـوك سـدره كليتـك

القلب طيرٍ لادعـي للهـوى حـام .. والا أنت وكره من كثـر ماهويتـك

كن العيون من النظر عقبـك أيتـام .. وكني ماريت الا أنت من يوم ريتك

وكنك معي وأنا فقدتك مـن أعـوام .. مـع الخيـال ألقـاك كنـي لقيتـك

من صعب وصلك ما تهنيتك أحـلام .. وان جابتك فزيت شـوق ومحيتـك

يعني وصالك صعب وأهدافي أوهـام .. يعنـي زرعتـك للقـدر ماجنيتـك

صبرك يقولون العرب كـل الأيـام .. يوم عليـك ويـوم لاجـاك جيتـك

ويا قلب ياللي ورثك اجـروح وآلام .. بليتنـي ماهـوب أنـا اللـي بليتـك

ولعتني من عادني في الهوى خـام .. وأسرفت بي وأنا خطامـك عطيتـك

طعتك وزبدة طاعتـك هـم وهيـام .. مالله كتب لي وأستخرت وعصيتـك

لوللقلـوب أسـواق بايـع وسـوام ..لا أبدلـك وان جيتنـي ماشريـتـك

والا أنت ياللي جيش عينيك مقـدام ..لا أقنعت منـك والرجـا مارجيتـك

كني سجين بين افـراج واعـدام .. وكنك سجن وأنـا بنفسـي بنيتـك

تنبيك عن حالي محاصيـل الالهـام .. وتخبرك نظراتـي نهـار ألتقيتـك

عقب الوصال اللي على عين من لام .. قد هو يكفيني عن الوصـل صيتـك

وقدني الى مريت بالشـارع العـام .. لديت من ما في الضميـر ودعيتـك

أدري ان صوتي ماقطع عشرة أقدام .. وأدري بي أعود الى مـن نصيتـك

ياشينهـا يامحنـيٍ راس الابـهـام .. ماقدر على شوفك وأنا عنـد بيتـك

الأعمار ما تضمن وأنا أخاف الأحكام ..أرثيك خـاف أودعـك مـارثيتـك