لو لا الشريعه والتقاليد والعرف|/|لا آهمل الشيله وآدق العصابه

[طبــ ع ــي كــذآ.. }~]

بسم الله الرحمن الرحيم

السلام عليكم ورحمة الله وبركاته


في مثل هالوقت من العام الماضي تحديداً في عطلة الربيع كانوا خوالي جنوب في الوادي
والوالده الله يطول عمرها ومن يقرا ووالديه ما غير تحط على الصحراء و تقول عزاه
وانا اعرف وش اللي في نفسها فديتها وبما ان ماعندي الا اخ واحد ومسافر الرياض يدرس
ومافيه غيري انا واختي عندها <----آجعتني كبدي وطلعت ورحت للخيمه اللي بنيتها وهي ماتدري
ويوم درت قالت امحق بنت <----لاني بنيتها لحالي وثاني يوم التهب ظهري
<---كل هالقصه عشان تقولكم انها كتبت القصيده وهي في الخيمه


مالكم بالطويله



استلموا وانشاءالله تعجبكم


لو لا الشريعه والتقاليد والعرف
لا آهمل الشيله وادق العصابه

واركب على الفكسار مع بندقي طرف
مع اشقر ٍ قرناس كل ٍ يهابه

جآدل ولا احب المياعه ولا الترف
بنت بدوي له موقف ٍ ينحكا به

وان كان تجهل بالذكر ودك تعرف
انشد كبار القوم ويا القرابه

حنا بني عجمان وكل ٍ يعرف
اهل القنازع باللقا ما تشابه

رح صفحة التاريخ اقرأ وبتعرف
يام العريقه وش جنت من ذيابه

قلته وانا من نسل شيخ ٍ يُعرّف
بالجود وانواع الكرم والمهابه

وراكان لامني ذكرت آتشرف
ولو لا المحرم شلتها ع الربابه

بس الوكاد لولا التقاليد والعرف
لا آهمل الشيله وادق العصابه

وسلامتكم


وادري انها مو ذاك الزود وانتظر ملاحظاتكم عليها
واعتذر من مراقبين ومشرفين منتدى صدى المشاعر لآني ماحطيتها بمنتدى المحاولات الشعريه
وذلك لآن اغلب الشعار متواجدين في هالمنتدى

اكرر اعتذاري وتقبلوا تحياتي