مرثية الشاعر ظافر بن مفلح الدوسري

[الـزيـر سـالـم]

هذه مرثية الشاعر ظافر بن مفلح بن بتال الخييلات الدوسري في أخوه ناصر ..

بديت أنا في الرجم لا عاد مرقاه = وياليت ربي من مجيه نهاني

تهيض المشحون يا عين عزاه = عين تهد الماء بليا سواني

يا عين يا عين الخطا يا معناه = أنتي خذيتيني وقلبي خذاني

ونيت أنا من ضامر القلب واقصاه = ونين من خلي كسيرٍ وحاني

تكفون كثرت التنهت وقول آه = وكثر الونين يهيضني ما رفاني

قمت اتوجد وجد من قلت اجداه = خلي طريح وحقق الليل داني

على اخوي اللي ما تذكرت عجفاه = ذرب اليمين وخاتمن المعاني

ياخزنتي لا وا عضيدي عضيداه = ياوين بدله لا ذكرت الاخواني

يا مهبل اللي قال عادك بتنساه = بنساه لا من طارش الموت جاني

والله ان نسيته لين بالحق نقفاه = ويحط لي بين النصايب مكاني

يا تجرتي خليتها يا حلالاه = منها الخبر وقف ولا عاد جاني

ياخوي الا وا خوي ياخوي واخواه = ماهوب مثل معقدين الاخواني

اخو الهدا عمري على طول لا ماه = وجدي على جمعاه كمن زماني

جيت المراح وذي بقايا سماياه = هذي مداهيله ولا كنه كاني

حي المراح وحي من كان قد جاه = وياونتي لا جيتناله مكاني

يا وسع فرجة ناصر لا ذكرناه = ومن عاضني فيه العوض ما هجاني

اعوي عوا ذيبٍ لقا الخد مخلاه = وابكي لا شرفت راس البياني

لا جيت انا قاع ٍ مشى فيه قد جاه = الاف قلبي لوف زرع ٍ ضماني

الحب لمنه سطى ويش يمحاه = لمن نشى في الكبد ما قد هاني

تكفون ماحدٍ شاف هو ناصرٍ جاه = ما عاد لا جيته ولا عاد جاني

اتلى العهد به في جهام ٍ دفناه = وحطوا عليه من الصفايح رزاني

حبه كوى قلبي ولا خف مكواه = واخفاه من بين الضلوع الحواني

يا الله يا خلاف ما شئً بيخفاه = اخلف علي بمن كان حزنه كواني

غدابه اللي ما درى من قفاياه = لاهوب لا يرحم ولا منه اماني

لو انه ينطح كان دونه نطحناه = وابصطبر عنده بماكان جاني

ولو انه يشرى بالثمن ما ذخرناه = بسوق خلعي واستعين بالاداني

الموت لا ياوي ولا حدٍ بينساه = وكم هو يفرق من بعيداً وداني

مير عساه في الجنه وهي جات ملفاه = وامه وابوه وهو بعد في الجناني

مابه على الدنيا حدٍ له مواساه = لا زان الوقت ابن ادم ٍ قد شاني

ابن رشيد اللي طروقه مخلاه = قد هو ضعيفٍ قاعدٍ في هواني

وختمانها ذكر النبي ما نسيناه = صلوا عليه وهللوا يا اخواني